Psykiatriska Sjúklingakærunevndin

Psykiatriska sjúklingakærunevndin viðger kærur um nýtslu av tvingsli í sambandi við innlegging á psykiatrisku deild. Um persónur í sambandi við innlegging á psykiatrisku deild er fyri tvingsli, sum t.d. tvingsilsafturhald, tvingsilsviðgerð ella fastspenning, so kann kæra latast til Psykiatrisku Sjúklingakærunevndina. Aðalendamálið hjá Psykiatrisku Sjúklingakærunevndini er at verja rættartrygdina hjá sjúklingum, ið eru fyri tvingsli í sambandi við innlegging á psykiatrisku deildini.


Tvingsilsinntrivini, sum kærast kunnu um, eru:

  • Tvingsilsinnlegging
  • Tvingsilsafturhald
  • Afturføring
  • Tvingsilsviðgerð
  • Fastspenning
  • Nýtslu av likamligum valdi
  • Nýtslu av persónligum ávaringar- og peiliskipanum og serligum hurðalásum
  • Verjufastspenning
  • Persónlig vernd, ið uttan steðg varar meira enn 24 tímar og hurðalæsing á deildini
  • Tvungna uppfylging eftir útskriving


Viðkomandi viðurskifti

Einki krav er um, hvussu kæra til Psykiatrisku Sjúklingakærunevndina skal síggja út. Kærast kann bæði skrivliga og munnliga. Kæruskjal til Psykiatrisku Sjúklingakærunevndina kann heintast her á síðuni, men tað er ikki krav at brúka hetta skjalið.

Tað er eingin kærufreist í sambandi við kærur til Psykiatrisku Sjúklingakærunevndina, men tá endamálið við at kæra til Psykiatrisku Sjúklingakærunevndina er at steðga óneyðugum ella órímiligum tvingsli, so er skilagott at kæra skjótast gjørligt.

Sjúkrahúsið hevur skyldu til at veita sjúklingum á psykiatrisku deild, ið eru fyri tvingsli, ein sjúklingaráðgeva. Sjúklingaráðgevin skal leiðbeina og geva sjúklinginum ráð viðvíkjandi øllum viðurskiftum í sambandi við sjálva innleggingina, uppihaldinum og viðgerðini á tí psykiatrisku deildini. Sjúklingaráðgevin skal eisini kunna sjúklingin um møguleikan at kæra og hjálpa sjúklinginum við eini møguligari kæru.

Psykiatriska Sjúklingakærunevndin skal taka avgerð skjótast gjørligt. Sjúklingakærunevndin skal kunna sjúklingin og sjúklingaráðgevan, um ikki avgerð er tikin innan 14 dagar eftir, at kæran er móttikin í nevndini. Samstundis skal nevndin eisini upplýsa, hvør orsøkin er til hetta, og nær væntast kann, at ein avgerð fyriliggur. Ein serlig regla er galdandi viðvíkjandi kærum um tvingsilsviðgerð, har givin er uppsetandi virknaður. Uppsetandi virknaður hevur við sær, at tvingsilsviðgerð verður ikki sett í gongd, fyrr enn sjúklingakærunevndin hevur tikið støðu til kæruna. Í hesum førum skal sjúklingakærunevndin taka avgerð innan 7 gerandisdagar eftir, at kæran er móttikin.

Faldari við kunning um kæru til Psykiatrisku sjúklingakærunevndina kann takast niður her á síðuni.

Eru ivamál ella spurningar viðvíkjandi Psykiatrisku Sjúklingakærunevndini, vegleiðir Føroya Kærustovnur fegin.


Lógargrundarlag

Reglurnar fyri Psykiatrisku Sjúklingakærunevndina eru ásettar í anordning nr. 185 af 13. marts 2009 om ikrafttræden for Færøerne af lov om anvendelse af tvang i psykiatrien.


Nevndin

Í Psykiatrisku Sjúklingakærunevndini eru tríggir limir. Í nevndini sita í løtuni:

  • Nella Festirstein, løgfrøðingur og forkvinna
  • Jeaneth Løkjá, lækni
  • Sámal Lindenskov, sálarsjúkrarøktari  

Varalimir eru:

  • Betzy Ludvig, løgfrøðingur
  • Heini Harryson, lækni
  • Súna Mørk

Valskeiðið hjá nevndini er 1.10.2017 til 30.9.2021 


Samband

Kæran kann – eitt nú umvegis sjúklingaráðgevan – latast inn til sjúkrahúsið, sum hevur skyldu til at senda kæruna til Psykiatrisku sjúklingakærunevndina.

Føroya Kærustovnur er skrivstova hjá nevndini. Sjúkrahúsið sendur kæruna til:  

Psykiatriska Sjúklingakærunevndin
c/o Føroya Kærustovnur
Undir Hornabakka
Postboks 45
110 Tórshavn

ella við telduposti til: fks@fks.fo

  • Kæruskjal
    Kæruskjal
  • Vegleiðing
    Vegleiðing